Sunday, October 08, 2006

ايها السادة الأحرار الرجالة ، سيبو الستات في حالهم


من كام يوم كنت بصلي التراويح ، دخلت الجامع ، لقيت مجموعة من الستات والبنات بيصلو جوه الجامع في الجزء المخصص للرجالة ،عاملين كام صف في الاخر وبيصلو شكلهم كان حلو جدا ، ويشرح القلب ، محاولتش اسأل عن السبب ، السبب المنطقي والواضح ان جزء الستات مليان والزياده دخلو معانا ،كلام جميل جدا ، بس طبعا ايه اللي حصل ، الكلام ده معجبش الساده الأحرارالرجالة وبدأو يتكلمو ، امام الجامع قالها صريحة ، يا جماعه الستات هيصلو معانا وهيدخلو من باب والرجاله من باب ، قالها صريحه عشان يقفل الموضوع ،عشان عارف الناس بتفكر ازاي في أي حاجه ليها علاقه بالمرأه ، بس على مين ،برده الهمهمات مستمره ، تلاقي واحد من الساده الأحرار الرجالة يقولك بكل حرقه وحماس وقرف واشمئزاز، ايه ده يا عم ، طيب ميصلو في البيت ، والتاني يقولك ايه ده ،هو على ايام الرسول كان بيحصل كده ،مع ان الجامع واسع جدا وفي فرق كبير بين الرجالة والستات ،لكن ازاي ،برده متضايقين جدا ، على فكره ، الناس ده ناس عاديين ، لا هم سلفيين ، ولا ملتحين ،ولا متشددين ولا محسوبين على التيار الاسلامي من قريب ولا من بعيد ، ناس عادية خالص بتصلي في الجامع ،يعني مش كفاية على الستات المتشددين اللي بيظلموها باسم الدين ، لا ، كمان الناس العادية (قصدي الرجالة العادية )
انا متأكد ان الاغلبية ميعرفوش ايه هو الحكم ، ولا على ايام الرسول كان بيحصل كده ولا لأ ، ولا يفرق معاهم أي حاجه ، طيب ايه الموضوع، الموضوع ان في ناس فجأه ضميرها الديني بيصحى (او هم بيتهيألهم ان ده ضميرهم الديني )، وقدرتها على الاعتراض بتظهر ، لما يكون الموضوع متعلق بالستات ، بس انت دخل الستات في الموضوع ، تلاقي كل الرجالة بتتكلم وبتفتي وليها رأي، يفضل الواحد فيهم ساكت ساكت محدش بيسمعلو صوت في أي موضوع ولا أي حاجه ، وفجأه تلاقيه عامل ثورة عشان كام ست عملو صف في جزء الرجالة
تاني يوم رحت اصلي ، الكام صف بتوع الستات اختفو ، اضايقت وحسيت ان الست تعرضت لفصل جديد من فصول الاضطهاد ، وحسيت بالندم ان انا متكلمتش لما كان الساده الأحرار الرجالة عاملين الأعتراض بتاعهم ، بس انا قلت اكيد مش هسكت،بصفتي واحد من كبار انصار المرأه ، بس مش هتكلم انهارده ، خليها بكره لما اتأكد ايه الموضوع
تالت يوم دخلت الجامع ملقتش برضه صفوف الستات ، قلت لا بقى ، لازم اعرف ايه اللي حصل وثورة السادة الأحرار الرجالة عملت ايه ، رحت على الشيخ بتاع الجامع ، قلتله انتو منعتو الستات انها تصلي هنا ، قالي لا ده الموضوع بس ان جزء السيدات كان فيه اصلاحات عشان كده كانو بيصلو معانا وخلاص الجزء بتاعهم اتصلح ورجعو فيه ،وخلص الموضوع على كده
ارتحت وقلت كويس ، عشان انا كنت ناوي اكبر الموضوع .(محدش يسألني كنت هكبره ازاي عشان انا مش عارف
وطبعا اكيد مش عايزاي حد يستعبط ويتهمني ان انا بشجع على الاختلاط مثلا ، كمان في ناس هتحس ان انا ببالغ ومكبر الموضوع ،يمكن، انا ساعات بحس بكده ، بس حسيت ان انا عايز اكتب الكلمتين دول ، فكتبتهم ، بس

3 comments:

Anonymous said...

ازيك يا نائل عامل ايه
الموضوع اللي انت طرحته ده جميل جدا ويستحق فعلا الطرح والمناقشة ، انا لسة راجع من عمرة من كام يوم واحب اقول للرجالة اللي انت بتقول عليهم دول ان جوة الحرم المكي نفسه الستات بتصلي جمب الرجالة وبيدخلو ويطلعو مع بعض ويطوفو مع بعض وعمر ما حد تنبه للمشكلة العظيمة اللي اعترض عليها اخوانا الله يهديهم ويصلح حالهم
المشكلة في رايي تكمن في الجهل والتعليم الديني الفاشل في مصر وفي كل الدول الاسلامية تقريبا والناس بقت تقريبا ماتعرفش حاجة عن دينها خالص وادخل اي جامع في مصر وانت تشوف كمية بدع وتاليف في الدين رهيبة الا من رحم ربي .
ربنا يعافينا يا رب ويرحمنا يوم ما يسالنا احنا عملنا ايه عشان نحارب الجهل المنتشر بين المسلمين ده.
لا اله الا انت سبحانك اني كنت من الظالمين.

Anonymous said...

مهو انت لو تبطل تروح على الجماعة الرابعة هتشوف الستات ولا انت فاكرهم بيتأخرو زيك ..!!

ألِف said...

الطبيعي أن النساء تصلي في نفس الحيز مع الرجالة.
دا نشاط روحي يا جدعان، هو في إيه!!

في سورية بيصلوا كدا، و من غير ستارة حتى. مش أنا بس ال شفتهم.

مش عارف بالضبط بس لو حد بيفهم في عمارة المساجد ممكن يأكد لنا أن وجود مكان حيز منفصل لصلاة النساء بدأ مع العصر التركي؟