Sunday, January 13, 2008

2007





اول السنة اللي فاتت 2007
قلت اعمل بقى اختراع كده واعلق اهداف السنة على الحيطة عشان تفضل قدامي
علقت التلات ورقات دول
صحيح اي واحد دخل الاوضه بتاعتي شبعني تريقه
وطبعا شايفين التعليقات المكتوبة عليها
بس معلش العظماء اللي زيي لازم يستحملو الناس العاديين
المهم عملت ايه بقى في الاهداف الجباره ده
الجواز ،طبعا زي منا ،لا تعليق مني او منكم لو سمحتم
رخصة العربية اسهل حاجه فيهم معملتش اي محاولة حتى شوية السواقة اللي كنت بعرفهم نسيتهم
الفرنساوي رغم انه الحاجه الوحيدة اللي مش باينلها اي فايدة على المدى القصير ولا البعيد
بس من اكتر الحاجات في حياتي اللي بذلت فيها مجهود ووقت وفلوس
مش عارف ليه
المفروض الواحد لما يحقق الهدف يشيل الورقة بتاعتها
بس 2008 بدات ولسه الورق متعلق

19 comments:

أبوشنب said...

بوست اثار في النفس شجون

انا ماليش في تعليق الورق

ولكن اقدر اقول 2007 كانت

فرصة سفر كويسة لغاية دلوقتي براجعها مع 2008 وممكن ارجع مصر خلالها

الرخصة اخدتها الحمد لله
كانت حلم وخلصتها مع اخر يوم في شهر اكتوبر 2007

كان ليا هدف اني استقر في لشغل بتاعي فترة طويلة
والحمد لله يعتبر لغاية دلوقتي انجاز كويس اني اكمل سنة من غير ما افكر اغير مكان شغلي

الجواز
اكتشفت ان مش كل ما يتمناه المرء يدركه
بالانجليزي
زير از مني سليب بتوين زا كب اند زا ليب

تعلم اللغة
عمال اسوف فيه من اربع سنين
لكن اخدت قرار ان 2008 هو عام موقوف لتحسين الانجليزي بتاعي

لسه باعت اميل للمجلس الثقافي البريطاني هنا في قطر عشان اعرف اسعارهم
هيا اغلى من مصر اكيد
بس كفاية تسويف

شكرا قوي ليكي انك اتحتي لي المساحة دي عشان اراجع نفسي

Anonymous said...

ايه ياعمى الاختراعات الجامدة دى؟ ياسلام لو كنت كل حاجة عايزاها اكتبها فى ورقة واعلقها عالحيطة كان زمان الحيطة خلصت ودخلت على حوائط الدول المجاورة بس ماعلينا... بالنسبة للفرنساوى انا شايفة ان اى لغة جديدة بيتعلمها الواحد كأنه بقى عنده عين جديدة يشوف بيها... اما بالنسبة للرخصة فماينفعش الكسل ده يانائل هى الشبح هتفضل مركونة كده كتير؟ ولا أقولك انت تجيب سواق وتخلص... اما موضوع الجواز:انت مستعجل ليه كده؟ لسه ليك عمر ياأخى... هيه هنعمل ايه بس... بالمناسبة فى اخبار عن مشروع المدونة بس بلاش عشان ماعيطش قصدى ماضحكش...خلاص!

^ H@fSS@^ said...

هههههههههههههههههههههههههه
ضحكتني جملة العظماء اللي زيك لازم يستحملوا الناس العاديين بقى
معاك حق احنا السرطانيين عظماء لكن بقلبنا النبيل بنعطف على عامة الشعب
هههههههههههه
جملة حلوة يا نائل
اما عن الاهداف فحدث ولا حرج انا مش حعايرك بشئ لاني اسواء منك بكتير في عدم تحقيق اي من رغباتي او اهدافي
الكسل بقى بعيد عنك و عن المدونيين

تحياتي و يا رب السنة دي تحقق كل احلامك على الاقل و فوقيهم هدفين زيادة عالماشي

شهيدة said...

سلام يا نائل

ازيك؟

انا مش عايزة أزود الطين بلة لكن بصراحة انا من اول ما عرفتك وانت بتحاول تحقق اهدافك دي... او على الاقل هدف الزواج

هدف الرخصة ده اول مرة اعرف عنه

المهم... هو يمكن السبب ان انت عندك ظروف معينة بتتعبك وبتعيقك (طبعا ده تبرير من أخت لأخوها) لكن انا عارفة السبب الحقيقي واللي هو انك ما بتدورش كويس

انا قلتلك كتير قبل كدة ... لازم تاخد الموضوع جد يا نائل وتتجوز بقى وتخلصنا يللا عايزين نشوف صور أولياء العهد على المدونة ماشي

انا عارفة انك بتحاول بس حاول أكتر :) اوك

اكيد مر عليك زمن ما سمعتش (أو قريت) الزن بتاعي هههه

معذورة بقى ومدنة أخوي وانا حرة فيها

يللا كفاية وجع دماغ

ربنا يوفقك وتخلص الفرنساوي اللي بقالك عمر بتدرسو :P

سلام

Hypatia said...

ازيك يا نائل

بص ابتدى بالرخصه مفيش اسهل منها

والفرنساوى انت اساسا ماشي فيه

والجواز مقدور عليه ان شاء الله

بس انت متكلكعهاش على روحك انت مش بتطلب المستحيل كلها حاجات بسيطه وانت قدها وقدود يا نائل بس انت شكلك كسلان شويه

علق ورقه تانيه
"اعاده احياء فؤاده"

تحياتى

Hypatia said...

نائل انت مختفى بقالك كتير فيه ايه طمنى

Anonymous said...

سلامة عيونك يافؤادة...انشالله عتريس هو ورجالته..خلاص!

Anonymous said...

يا نائل فكر معي شويه عندي حل لك ثلاثي الابعاد
ان تتزوج فرنسي
الفوائد
اول الفوائد انك اتجوزت وايه فرنساوي يعني هتنسب نابليون
ثانيا اكيد هتعلمك فرنساوي وكده يبقي وفرت فلوس الكورسات
اخير انها اكيد معها عربيه وهتعلمك وهتجيب لك عربيه بيجو كمان
ايه رائيك يا نونو
اورفار

فؤاده said...

شكرا على السؤال
انا بس كانت عيني تعبانة الفترة الفترة اللي فاتت بس هرجع قريب

Hypatia said...

الف سلامه عليك يا نائل سلامه عنيك
طيب برضه طمنا عليك دايما
وباذن الله حتبقي احسن من الاول قريب

مصر هى أمى said...

ازيك يا نائل

معلش الورقة اللى انتى معلقها بقالك سنة اعتبرها كأن لم تكن

واعتبر انك لسه معلقها السنادى 2008
وحاول تطبق اللى انت تقدر عليه

فؤاده said...

ابو شنب

السفر تجربة جامده موت حاول تستفيد منها على قد مات تقدر المهم اسرتك تكون معاك بس ده اهم حاجه
وبعدين انت يعني عايز تغيظني عشان انت طلعت رخصة

فؤاده said...

خلاص
احنا هنقضيها تريقه ولا ايه
هو انتو عشان عندكم كل واحد في العيله عنده عربية هتتكبرو على خلق الله
وكمان بتتريقي عليه عشان انا عجزت خلاص
على العموم شكرا على تشجيعك في موضوع الفرنساوي

فؤاده said...

حفصة
ههههههههههه
اعمل ايه بس في مخزون البارانويا اللي عندي ده
ادعيلي انتي بس اخلص دول وبعدين ازود اهداف تاني

فؤاده said...

معاكي حق فعلا
الحاجات ده مش بس موجوده من 2007 لا من فتره طويله
بس هو اختراع الورق بس اللي جديد
المهم اشيلهم قبل 2009

فؤاده said...

نسرين

اولا
شكرا على سؤالك
ثانيا شكرا انت انتي خليتي الدنيا سهله كده
انا فعلا لازم اتحرك شوية
ومتقلقيش فؤاده في المشاريع الجديده

فؤاده said...

علي

فكرة جامده موووت
احب انا الناس اللي بتنجز ده
واللي هيسهل الموضوع ان انا اكيد اي واحده فرنساوية تتمناني

فؤاده said...

مصر هيه امي

انا عملت كده ، بصراحه انا خايف الورق يبقى ديكور في الاوضه

شبـــاك موارب said...

إيه ده هو انت منهم؟
انا كل ماكتب علي اللي بخطط ليه في ورقة معملش و لا حاجة
مش عارفة ده كسل و لا إيه
بص يا نائل
انا قررت اسيب كل حاجة للظروف
اه و الله
يعني مثلا كنت عايزة اخدت كورس انجليزي
و مخططة لكده بس مش عارفة
بالصدفة و انا ماشية في وسط البلد لقيت يافطة بتعلن عن كورسات انجليزي
روحت علي طول طلعت و حجزت الكورس و اخدته
عموما البوست ده قديم انت كتبته من زمان
يا ريت تقولنا أخر التطورات ايه؟